Mawrâh Governor Vakkom B.Purushothaman-ta MADC a ôpachhôh achupasia awpa ta Siaha kaw tly

Governor-ta India sawhkhâ lâta ADC sâthôhpazy phie awpa ta a tlôkhei tahpa he bielei-bielôpa (Baseless) a châ” – Governor

Siaha, târi noh 25, Hmypi, 2014 : Zâhnia târi noh 24, Hmypi, 2014 liana khata Mawrâh Governor, Vakkom B.Purushothaman ta noh no châh awpa ta Siaha a kaw tlô. Governor heta MADC a ôpachhôh liata su nano nanopazy tly laipa aw ta; târi noh 27, Hmypi, 2014 liana khita Siaha apuasai ha heih aw. Mawrâh Governor ta MADC a kaw tlyna liana heta Dr K.Beichhua, Siaha Biatuhpa ta a  chakaochahlâ.

Governor of Mizoram

Governor of Mizoram at Siaha

Governor he zâhnia my dawh 11:30 liana khata Siaha Helipad liata zawtheina ta kaw tlapa ta, dawh 11:40 Pm liata Circuit House liata CEM, MADC, Siaha Biatuhpa MLA nata Siaha liata Department nano nanopa hyutuhpazy ta ama vaw dy; Zâlâ dawh 12:30-pa liata MADC pachhuahpanohpa ta adyhna daihti, MADC Office tlyliah liata a rônah kawpa ta hmâpa a châ. Governor dyhna daihti MADC Tlyliah liata pachhuahpanohpa liana heta RT Zachônô, CEM, MADC-ta Governor aly-uana biereina hnei ta, dyhna hlasana cha Mara Hlasa Py (MHP) Opi, Siaha ta ama hnei hra. He khai tawhna heta MADC Cultural Troupe, Art & Culture Department, MADC-zy ta pho lâ pamosapa ta, Vakkom B.Purushothaman lâta hmosaipiepa hlâna cha RT Zachônô, CEM, MADC-ta a hnei. Governor he Dawhkho lai kawpa piepa a châ. He khai tawhna heta Mara hlasathaipa John Beizachhi Phuto-ta mopakha hlasana hnei ta; Governor biereipa nahthlie pazaopâpa a châ. Governor chata, Chi pho hnôhkhaw viapa nata chyh viapazy he sawhkhâ ta khâsia ngâthlâh ha ta; hmahsiena ama hnei thei n’awpa ta atheina zydua apapua ngâthlâh ha na, a ta.
MADC liata Governor dyna daihti hmâ khai tawhna heta, Circuit House, Siaha liata NGO nano nanopazy nahta apakyhna daihti hmâpa ta, he liana heta MSO, MTP, MCHP, MHIP, LWA-vyuhtuahpazy ta Governor hnona heta Siaha District ta hmo ângiahpa nano nanopazy ama tlôkhei. NGO nano nanopazy ta ama tlôkheipazy cha, MSO lâ tawhta, Mizoram University-ta Mawrâh chho lâta Campus a pahy awpa liata Gov’t. Siaha College cha Constituent College hawhta tao hra awpa nata Siaha District asiepahliena chhietu hapa chôchâh châ ta; MTP heta rai apahawhna chôchâh nata asiepahliena chôchâh tlôkhei ei ta; MCHP, MHIP nata LWA-zy heta Siaha Thohna-O liata Hawsaih mohôhthaipa Dawhty, “Child Specialist” nata chanô pasana lâta athaipa dawhty Gynaecologist soh awpa ta hmahlakhei awpa ama vaw tlôkhei hra. He NGO nano nanopazy hmo tlôkheipa he Governor chata atheina zydua ta âvaw chadai pazi awpa zie ta bie âvaw taih hra ei. He khai tawhna heta Governor heta Siaha liata Thâtihthiehpa lapakhytuhpazy apakyhna a hnei heih hra.
Zâhnia zâlâ ta Governor ta Siaha thâtihbuzy âpakyhna liana heta, Thâtihbu chyhsazy lâ tawhta hiahrihna nano nanopa achhyna hneipa ta, Deiva hiahrihna, “Governor-ta Mawrâh liata Autonomous District Council-zy phie awpa ta Central lâ a tlôkhei?tahpa he biedopa a châ ma?” tahpa ta hiahrihna cha, Governor heta, “Bielei-bielôpa (Baseless) a châ” tahpa ta, cha hawhna hmahlana a hnei tlâ leina zie Deiva a chho. He khai tawhna heta, Governor heta Deiva hiahrihna, “MADC liata hriatuhpa hluh pakhô hapazy pachyh awpa ta Chief Executive Secretary, MADC apahnosa, tahpa he biedopa a châ ma?”tahpa cha, “MADC liata hriatuhpa ama hluhtu hapa vâta, sôh hmâna a do thai khao leipa ta, hmahsiena châta sôh akhypazy chhao hriatuhpazy hlao lâta a sie khai ha tyh. He he phusâ alila leipa ta hmâna a châ” tahpa ta, ano ta apahnokhei leipa hriatuhpa ama lapazy cha amopazi aw, tahpa ta Deiva hiahrihna âchhy hra. Thâtihbu chyhsazy âpakyh khai tawhna heta Siaha liata sawhkhâ Department nano nanopa hyutuhpazy âpakyh heih hra.
Governor heta atanoh lâ liana heta Siaha liata Middle School nano nanopa liata achuhaipazy tly aw ta; he khai tawhna heta hâra deichhyna O-zy atly heih hra aw. Zâlâ dawh 2:30 âkhophie liata Tipi Ferry tlypa ta, mylâ târi noh 26, Hmypi, 2014 liana khita Beinô chavah a tly heih hra aw. Ryhraohna hawhta a châ khiahta cha târi noh 27, Hmypi, 2014 liana khita Siaha a puasai lilawh ha heih aw.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s