Ziza pha kawpa ry liata Mawrâh Assembly Atlyhna hneipa a châ

(Zâhnia liana khata Mawrâh Assembly Atlyhna châta Vote pathlapa a châ haw;EVM thokha ta rairuna tlôkhei)

Siaha, târi noh 26, Phiapi, 2013 : Zâhnia târi noh 25, Phiapi, 2013 liana khata Mawrâh Assembly atlyhna cha Mawrâh pôpalôhpa raohpa ta Siaha District chhôh Bia bia sâno Siaha nata Palâ bia liata chhao zâhnia my dawh 7:00 nata zâlâ dawh 4:00 likah liata ziza diapa nata athlâzi kawpa ry liata Vote pathlapa châpa ta, Vote chhao atlâhpipa ta a tla pha kawpa ta pahnopa a châ. Siaha bia liata cha Vote tlapa he 79% tla ta, Pala Bia liata 82.17% tlapa ta, he thatiht lapakhy hainona heta Lomasu pahnotheipa cha mah vei . He hawhta a châ nona heta, Palâ bia chhôh, Zyhno, Iana, Phurâ nata Tipâ Bazar liata EVM-zy a pha leipa vâta thlapa châpa ta, Siaha bia liata Tisôpi EVM thlapa a châ hra.

Zâhnia my dawh 7:00 tawhtaVote pathla theina daihti pahypa liana heta Siaha biatuhpa a châhaipa, Puhpa S.Hiatô Minister nata alahpinô chhaota Vote ama hneina New Siaha West Polling Booth liata Vote pathla tuachaipa châpa ta, Dr.K.Beichhua MNF Candidate chhaota Siaha Vaihpi-II liata pathla hrapa ta, ZNP Candidate Puhpa F.Lalhmachhuana ta Vote ahneina su Siaha Vaihpi-III liata Vote a pathla hra.

Zâhnia târi noh 25, Phiapi, 2013 my dawh 7:00 nata zâlâ dawh 4:00 likah liata Voter 690,860 yna Mawrâh Assembly, Seat 40-yna Atlyhna liana heta Congress nata Mizoram Democratic Alliance, Mizo National Front (MNF), Mizoram People’s Conference nata Maraland Democratic Front-zy apakaohpa cha a chatôh chai awpa châ ei ta. Mawrâh Assembly Seat 40 liata Seat 39 he Tribal châta sohpa châpa ta, Seat 1 cha General châta sohpa a châ hra. Mawrâh Assembly Atlyhna liata Vote tlapazy he târi noh 9, Di, 2013 liana khita reipa a châ aw.

Mawrâh zawpi maluh Thyza 10.91 (lakhs) yna liana heta, chanô Voter 350,333 ypa ta, chapaw Voter 340,527 ama y hra. Chanô Voter he chapaw hlâta 9,806 ta ama hluh via, tahna a châ. Atakô ta MLA Candidate 142 hry liana heta pacharu (6)-cha chanô châ ei ta; he hawhta a châ nona heta Candidate hry liata hmia thiehpa y tu veih ei. Atakô ta atlyhna liana heta hmo ngiatlâh kawpa sâkha ypa ta, cha cha Voter-zy ta ama khoh chaipa ama Vote tahpa pahnotheina, Voter-Verified Paper Audit Trail (VVPAT), MLA Bia 10 liata ama hmâ pathaopa kha a châ thlyu aw. He he India râh liata ama hmâ tua chaina su a châ hra.

Atakô ta MLA Atlyhna liata Bia nah pachô chai awpa ta pangiasapazy cha Lal Thanhawla, Mawrâh Chief Minister aduana Bia, Serchhip nata Hrangturzo hleikhôta, MNF hyutuhpa Zoramthanga aduana Tuipui East-zy a châ.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s